8.937.165 euroko aurrekontu totala izango du Soraluzek 2026rako. Kopuru horretan, baina, Olaldearako inbertsio berezia ere badago sartuta, kanpotik etorriko dena; hura kenduta, Soraluzeko Udalaren 2026ko aurrekontu erreala izango da 6.706.164 euro, iazkoa baino (5.576.789 euro) %20 handiagoa. EH Bilduren eta PSE-EEren aldeko botoekin eta EAJ-PNVren abstentzioarekin onartu zen Udal Gobernuaren proposamena. Inbertsioei dagokienez, 3.083.244 euro bideratuko dira eta inbertsio nagusia Olaldea berroneratzeko izango da, 2.137.500 euro.

Atzo, eguena, PSE-EE alderdiak babestu egin zituen EH Bilduk aurkeztutako udal aurrekontuak. Patricia Borinaga bozeramaileak boto azalpenean nabarmendu zuenez, alde bozkatu zuten, oro har, “alderdi guztiek adostutako proiektu gehienak biltzen dituelako” aurrekontu proiektuak, eta zehazki, “gure alderdiak legegintzaldi honetan egindako ekarpen batzuk jasotzen” dituelako. Horrekin batera, “eskerrak” eman zizkion Udal Gobernuari aurrekontuen negoziazioan “erakutsi duen jarreragatik” eta “akordioak lortzeko erakutsi duen prestasunagatik”.