Urteko azkeneko egunean San Silbestre lasterketa herrikoia egingo da aurten ere. Herenegun, martitzena, hasi ziren antolatzen Kirol Mahaiak deitutako batzar irekian, eta, iazko esperientzian oinarrituta, zenbait aldaketa proposatu dituzte. Batetik, iaz baino ordubete geroago hastea, 12:00etan, eta, herriari buelta bat gehiago ematea, ibilbidea luzatzeko. Bestetik, partaidetzari dagokionez, emakume gehiagok parte hartzea nahiko lukete eta, horrez aparte, lasterketa girotzeko, sari berezia emango diote mozorro onenari.

Asteburu honetan, liga jardunaldi betea dute Sorako taldeek, eskolarteko mailakoek ere jokatuko baitute eta ondorioz, 10 norgehiagoka jokatuko dituzte zapatuan eta domekan. Hitzordu guztiak bi izan ezik dira kanpoan. Erregional mailakoek, adibidez, Donostian jokatuko dute domekan. Etxean, berriz, zapatuan izango dira bi partidu, Infantil A mailakoena 10:00etan, Azpeitikoen kontra eta Kadete 1. mailakoena 12:00etan, Urkiren kontra.