Soraluze Futbol Taldeak domekan aurkeztuko ditu 2025-2026 denboraldiko taldeak. 15:30ean hasita, txikitik handira zelairatuko dira 160 bat jokalari, futbol eskolatik hasi eta Erregional mailarainokoak, baita 20 bat entrenadore ere. Ekipazio berria ere aurkeztuko du Sorak. Ondoren, 17:00etan, nagusiek Ligako lehen partida jokatuko dute Urkiren kontra, Iokin Arrillaga entrenatzaile dutela. Aspaldiko partez, herriko entrenatzailea izango du Soraren lehen taldeak.

Atzo, zapatua, Iruñeatik, Donostiatik, Eibartik eta Alellatik etorritako rugby jokalari beteranoak izan ziren Ezoziko zelaian. Etxekoekin batera bina talde osatu, eta, gogotsu jokatu zuten euren artean. Lagun artekoa izanda ere, askok dena emanda jardun zuten. Gero, SoraGazteak klubeko jokalari gazteekin eta zenbait gurasorekin batera beste bi talde osatu eta azken partida jokatu zuten elkarrekin. Beteranoen esperientzia gazteen odol berriarekin nahastuta, errugbi giro ederra izan zuten Beteranoen Egunean.