Suabe samar hasi zen Mutrikuren eta Soraren arteko zapatuko partidua. Zelaian batera eta bestera ibili ziren biak ala biak, arrisku larregi sortu barik.
Baina bigarren zatia hasi eta berehala aldatu zen panorama. Epaileak Mutrikuren aldeko penaltia seinalatu zuen 46. minutuan eta haiek sartu egin zuten gola.
Kontrako markagailuaren aurrean, segituan indartu zuen erasoa Sorak eta 54. minutuan ia-ia berdinketa lortu ondotik (bideoan), hortik minutu eskasera Soraren alde izandako korner batetik etorri zen Markel Gilen gol ikusgarria eta etxekoen berdinketa.
Hortik eta partidua bukatu arte, ahaleginean segitu zuen Sorak eta aukerak ere izan zituen, baina banakoarekin konformatu behar izan dute oraingo honetan.
Hurrengo hitzordua etzi, barikua, dute. Mintxetan jokatuko dute Elgoibar taldearen kontra, ezohiko egunean eta orduan, barikuan, 21:15ean hasiko baita norgehiagoka.
Azken jardunaldiko berdinketaren ondoren, hirugarren doa Sora sailkapenean, aurrenengo biekiko puntu bakarrera. Elgoibartarrak, berriz, bosgarren doaz, Sorarengandik 4 puntutara.