Iazko San Silbestre lasterketaren bidetik etorriko da aurtengoa, izaera herrikoiarekin eta ez lehiakorrarekin eta jai giroan egiteko asmoarekin. Baina berritasunak ere izango ditu.
Adibidez, berritasunetako bat da, jendea mozorrotuta parte hartzera animatzeko, mozorro onenari sari berezia emango diotela. Halaber, irteera orduan ere izango da aldaketa, iaz goizegi abiatu zelakoan, aurten, 12:00etan hastea proposatu dute.
Eta lasterketaren ibilbidea ere aldatu egingo dute, luzatu. Iaz baino itzuli bat gehiago egin nahi dute, sei guztira, iazko lasterketa motz gelditu zela ondorioztatu baitute.
Hori bai, iaz moduan, aurten ere Plaza Barrixan txokolatea, salda eta txorizoa banatuko zaie lasterketako partaideei.
Emakume gehiago nahi
Osterantzean, partaidetzari dagokionez, emakumeen partaidetza indartu nahi dute aurten. Horretan laguntzeko, asmoa da abenduan hasita emakumeen arteko entrenamendutxoak egitea. Antolatzaileek esan dute hitzorduak zehaztu ahala joango direla jakinarazten.
Azkenik, San Silbestre lasterketarako izen-ematea abenduan bertan zabalduko dute. Kiroldegian ipiniko dute izena emateko aukera, jendeari erraztasunak eman nahian. Horrez aparte, lasterketa egunean bertan ere posible izango da izena ematea.