Atzoko elkarretaratzean esandakoen artean, kritikatu egin zuten EiTB moduko erakunde publiko batek zahartze osasuntsua bultzatzea, eta, aldi berean, EAEko Gobernuko alderdiek pentsioak osatzearen aldeko Herri Ekimen Legegilea (HEL) eztabaidatzeari uko egitea. “HELaren onuradun diren 90.000 adineko pentsiodunek, batez ere emakumeek, dantza asko egin arren, gero eta arazo gehiago dituzte hilaren amaierara iristeko, osasun integrala, elikadura osasuntsua, etxebizitza erosoa eta mendekotasuna artatzeko ezinbesteko zerbitzuak eskuratzeko. Inork pentsa al dezake baldintza horietan zahartze osasungarria egin daitekeela? Arazo horiei aurre egingo al zaie aurtengo EITB Maratoiarekin?”, galdegin zuten.
Gaineratu zutenez, EiTBren aurtengo maratoiarekin batutako dirua Berrikuntza eta Ikerketa Sanitarioko Euskal Fundazioarendako izango da, “gobernuaren aurrekontuekin ordaindu beharko” litzatekeen eta “hartzaileen parte-hartzearekin ebaluatu beharko litzatekeen” programa batendako.
Pentsioen osagarria nahi
Bestelakoen artean, dei egin zuten abenduaren 18an Gasteizen izango den manifestazioan parte hartzeko. Bertan gutxieneko pentsioendako osagarria aldarrikatuko dute berriro. Jakinarazi zuten, 2026ko aurrekontuei begira, negoziazioak blokeatuta daudela eta “ulertezina” iruditzen zaie “1.100 eurora arte osatzen duen Nafarroako akordioa ez errepikatzea” EAEn. “EHPMk salaketa kanpainari eusten diogu”, esan zuten.