Atzoko elkarretaratzean, parez pare jarri zituzten pertsona fisikoek eta sozietateek ordaintzen dituzten zergak; pertsonek bildutakoaren %75,6 eta sozietateek %9,8. Azpimarratu zuten “langileek, pentsiodunek eta bestelako herritarrek zergekin ekarpen handienak” egiten dituztenak izateaz gain, eurengandik eskuratzen dituztela “plusbalioak eta etekinak diru-edukitzaile handiek”.
Hori horrela eta ikusita “enpresariek, bankariek, multinazionalek mozkin izugarriak” dituztela, gogorarazi dute “irabazi eta fortuna handien zerga-bilketa justuagoa balitz eta lortzen dituzten diru-sarreren araberakoa, eta beren zergak saihesteko erabiltzen dituzten paradisu fiskalak ezabatuak balira”, ez litzatekeela arazorik izango pentsioak, baita gutxienekoak ere, ordaintzeko.
Gaineratu zuten Herri Ekimen Legegileari ezezkoa eman dioten arren, horren alde borrokan segituko dutela eta mobilizazio gehiago iragarri zituzten.