Eguazteneko itxialdiari dagokionez, Gasteizko Koroatze elizan egingo dute eta esan dutenez, Hego Euskal Herriko hiru lurraldeetako 50 pentsiodunek hartuko dute parte. Eguaztenean 10:00etan hasi eta egueneko 10:00ak arte egongo dira bertan.
Eguenean, berriz, herrietako pentsiodunen mugimenduetatik bertaratuko direnekin batera, manifestazioak egingo dituzte Gasteizen, Legebiltzarraren aurrean eta Iruñean. Eskatuko dutena da “Lanbide Arteko Gutxieneko Soldatarekin parekatu arte osatzea, eta banaka aitortu eta aplikatzea, hau da, familia unitatearen diru-sarrerek baldintzatu gabe aplikatzea”.
Osterantzean, 2026an pentsioek izango duten %2,7ko igoerari buruzko irakurketa partekatu zuten atzoko elkarretaratzean. Labur esanda, igoera horrekin eta kontuan hartuta azken lau urteotan KPIaren metaketa %19koa izan dela eta erosketa-saskiaren igoera %36koa, pentsiodunak erosteko ahalmena nabarmen galtzen ari direla salatu zuten.