1. Albistea
Istripu larria Gi-627 errepidean
2024ko irailaren 1ean
Irailaren 1ean istripu larria gertatu zen Soraluzen, Gi-627 errepidean, Embalajes Ansola eta Unamuno artean. Auto bat errepidetik irten eta irauli egin zen. Bost pertsona zihoazen barruan, bostak plazentziatarrak. Zorionez, gaur egun, bostak onik daude.
2. Albistea
Aratosteetako Olinpiadak
2024ko otsailaren 10ean
Aurten, Olinpiadak izan ziren Aratoste zapatuan mozorrotzeko gaia. Zuzi olinpikoak, dominak, komiteak eta era guztietako kirolariak agertu ziren kaleetan.
3. Albistea
Desocupacyl enpresa Ezozibidean
2024ko ekainaren 5ean
Ekainaren 5ean, Desocupacyl enpresako hainbat kide ultraeskuindar joan ziren Ezozibidera etxebizitza bat hustera eta tentsio uneak bizi izan ziren. 30-40 bat herritar batu ziren "faxistak" ongi etorriak ez direla adieraztera. Polizia ere bertaratu zen, eta, azkenean, Ertzaintzak eskoltatuta joan behar izan zuten Desocupacyl enpresakoek. Bidean, herritarrek Faxistak kanpora! oihukatu zieten eta baita harrika egin ere. Poliziak hainbat lagun identifikatu zituen.
4. Albistea
Plazentzian ere atera zen Gabarra
2024ko apirilaren 11n
Apirilaren 11n, Athletic-en gabarra Ibaizabalen zebilen bitartean, beste txikiago bat ibili zen Deba ibaian gora eta behera, Atletic-en kopako garaipena ospatzen. Harkaitz Soriak atera zuen Gabarra Soraluzen, bezperan zuri-gorriz dotore margotuta, alaba lagun zuela.
5. Albistea
23. Korrika Soraluzen
2024ko martxoaren 20an
Martxoaren 20an, 23. Korrika pasatu zen herrian. Jendetza batu zen herriko kaleetan euskararen aldeko ekimenari harrera egiteko.
6. Albistea
Gaztañerre Azoka ederra eta oparoa
2024ko azaroaren 9an
Azaroaren 9an egin zen Gaztañerre Azoka. Aurten, San Andres auzoko Mari Carmen Aranberri Arano, Moises Arizaga Larrañaga, Jesus Arizaga Larrañaga eta Maria Jesus Laskurain Aranberri omendu zituzten. Haiekin batera, Osuma baserriko Juan Inazio Laskurain oroitu zuten eta Pedro Erkiaga albaitaria omendu ere bai.
7. Albistea
Desagertuta zegoen bergararraren gorpua aurkitu zuten ibaian
2024ko otsailaren 29an
Otsailaren 29an, larrialditako zerbitzuek desagertuta zegoen bergararraren gorpua atera zuten ibaitik, Soraluze eta Osintxu bitartean.
8. Albistea
Marraskilo Tour jendetsua
2024ko urriaren 6an
Urriaren 6an egin zuten Marraskilo Tour mendi martxa eta 122 lagunek parte hartu zuten, eguraldi ederrarekin.
9. Albistea
Santa Eskean baserriz baserri
2024ko otsailaren 3an
Otsailaren 3an, Santa Eskeko taldea baserririk baserri ibili zen kantari. Eneko Beretxinagak, Iosune Aramendik eta Jexux Mari Irazuk kantatu zituzten koplak.
10. Albistea
Koldobika Jauregiren azken erakusketa Oreka Art galerian
2024ko ekainaren 14an
Ekainaren 14an, Koldobika Jauregi eskulturgileak erakusketa inanuguratu zuen Oreka Art galerian, ikusmin handia eraginez. Handik bi egunera hil egin zen Alkizako artista.