Urtetik urtera potolotzen doa Denis Soriano arrantzalearen palmaresa. Azken sariak joan den astean eskuratu zituen, Aragoin jokatutako Espainiako VI. txapelketan. David Iglesiasekin bikotea osatu eta Gallego ibaian lehiatu ziren Espainiako lurraldeetako bikoteen kontra.
19 amuarrain harrapatu zituzten lehiaketak izan zituen lau mangetan. "Arrain gutxi” Sorianoren esanetan. Baina manga guztietan puntuatu zuen euskal bikoteak eta horri esker lortu zuten sailkapeneko hirugarren postua. Sorianoren esanetan, “gogorra” izan zen lehiaketa, “bero handia” egin baitzuen eta horrek lehiakideengan eragina izan zuen fisikoki.
Aragoiko txapelketarekin, 2025eko denboraldia "borobil" bukatu du Soraluzen bizi den aramaioarrak; bere esanetan, izan duen “urterik onenetarikoa” izan da honakoa. Izan ere, apirilean, Euskadiko txapeldun izendatu zen eta ekainean, hirugarren postua eskuratu zuen Euskadiko Federazioarekin eta bosgarren postua, berriz, banaka, Espainiako txapelketan.
Soriano Tolosako Arrantzaleak klubeko kidea da; esplikatu duenez, Gipuzkoan arrantzako klub gutxi daude, adibidez, Debarroan ez dago bat bera ere.
