Maiatzaren 22tik 25era jokatu zen Espainiako Izokinkideen LVII Txapelketa Lance modalitatean, Gaztela Leongo Orbigo errekan. Bi txapelketa izan ziren, selekzioen artekoa eta banakakoa, eta bietan primerako emaitzak lortu zituen Denis Sorianok.
Selekzio autonomikoen artekoan, hirugarren sailkatu zen Euskadiko Federazioarekin, Gaztela Leonen eta Errioxaren atzetik.
Espainiako banakakoan, bosgarren
Espainiako banakako txapelketan bosgarren sailkatu zen. Kasu horretan, puntuka eta mangaka erabakitzen zen sailkapena eta Sorianok, bigarren mangan lortu zuen emaitzarik onena, 17 amuarrain harrapatuta. Azken manga, baina, errekaren zati "eskas" batean tokatu zitzaion eta itxaropen gutxirekin jarraitu zuen Soraluzen bizi den aramaioarrak. Hala ere, azkenean, uste baino emaitza hobea eskuratu, eta horri esker, bosgarren sailkatu zen Espainiako banakako txapelketan.
Ondorioz, konpetizio altuko sailkapenean sartzea lortu du Sorianok eta sailkapen hori da kontuan hartzen dutena mundialen bat jokatzea tokatzen denerako.
Soriano, “oso pozik” dago lortutakoarekin, bai “pertsonalki” eta baita ekipoarekin ere. Hurrengo hitzordua irailean izango du, Bikotekako Espainiako Txapelketan, Biescasen. David Iglesiasekin osatuko du bikotea.