Hasi da jendea Oroimenaren Bulegora joaten

Ione Zuloaga Muxika Oroimenaren Bulegoan, gaur goizean, eguaztena.

Gaur, eguaztena, 10:00ak geroztik, zabalik da Aranzadi Zientzia Elkartearen Oroimenaren Bulegoa. Bertaratzen diren herritarrei arreta emateko Aranzadi elkarteko historialari Ione Zuloaga Muxika dago udaletxeko osoko bilkuren aretoan. Kontatu duenez, jendea hasi da bulegora joaten. 18:00ak arte izango da zabalik bulegoa.

Bigarren astea du Oroimenaren Bulegoak udaletxeko osoko bilkuren aretoan. Martxoko eguaztenetan izango da bertan, Soraluzen errepresioa jasan duten herritarren testigantzak batzen. “Soraluzen jaio direnen, hemen bizi direnen edo bizi izan zirenen zein errepresioa Soraluzen jasan izan zutenen eskubide urraketen berri jasotzea da helburua, dokumentazioa zein testigantzak, biak”, kontatu du Ione Zuloaga Muxika historialariak.

Zuloagak kontatu duenez, poliki-poliki herritarrak hasi dira bertaratzen. “Lehenengo egunetan gutxi etortzen dira eta gero joaten dira ugaritzen. Gu hementxe izango gara martxoko eguazten guztietan eta etortzen dena ongi etorria izango da. Gainera, ez dago zertan aldez aurretik txanda hartu behar”.

Hala ere, norbaitek informazio gehiago nahiko balu: 943 46 61 42 edo memoria@aranzadi.eus. 

Erlazionatuak

Bihartik, eguaztenero izango da zabalik Oroimenaren Bulegoa

Politika

Soraluzeko memoria historikoa batzeko bi urteko ikerketa abiaraziko dute, Aranzadi Zientzia Elkartearen eskutik. 1936tik gaur egunera arte soraluze...
Herriko memoria historikoari buruzko ikerketa abiaraziko dute, Aranzadiren eskutik

Politika

Soraluzen, herriko memoria historikoari buruzko ikerketa abiaraziko dute martxoan, Aranzadi Zientzia Elkartearen eskutik. Helburua da 1936tik gaur ...