Ikastetxeen ikasturte hasiera orokorrarekin batera abiatu du berea Soraluzeko Musika Eskolak. 113 ikasle matrikulatu dira momentuz, 82 ikasle dabiltza instrumenturen bat ikasten, eta, beste 30 ikasle matrikulatu dira Musika eta Mugimendua eta Musika Kantuz ikasgaietan.
Horrez aparte, eskolak eskaintzen dituen bost bekak beteta daude. Haien bitartez, hiru ikaslek Musika eta Mugimendua ikasi ahal izango dute eta beste bik Musika Kantuz eta instrumentua.
9 instrumentutan lekuak
Kopuruz, iaz baino ikasle gehiagorekin hasi du 2025-2026 ikasturtea, baina, zuzendaritzako kide Nagore Sanzek esan duenez, oraindik badaude hainbat leku libre honako bederatzi instrumentutan: flauta, trikitixa, biolontxeloa, biolina, panderoa, txistua, gaita, tronboia eta tronpeta.
Halaber, jubilatu/helduentzat ere aukera zabalik dago, kasu horretan, instrumentuan zein Musika eta Mugimendua ikasgaian. Bi kasuetan, izena emateko musika eskolara bertara daiteke edo telefonoz deitu: 943 75 15 44 edo idatzi: soraluzemusika@gmail.com
Berrikuntza
Gainera, berrikuntzak ere izango ditu musika eskolak aurten, 9-10 urtetik aurrera praktika daitezkeenak: Fanfarre (asteartea 19:00-20:00) Banda gaztea (asteazkena 19:00-20:00) eta Big band/Konbo (osteguna 19:00-20:00). Talde handiak, berriz, urrian hasiko dira. Aukera dago halakoetan ere izena emateko. Baldintza bakarra da instrumentua eta musika ikasten bi ikasturte eginda izatea.
Santa Zezilia eta Blues Hotsak
Eskolak hasteaz batera, kalera begirako saioen prestakuntza lantzen ere hasi dira musika eskolan. Azaroan izango dituzte ikasturteko lehen hitzorduak. Batetik, Santa Zezilia musikarien eguneko ospakizuna, eta, bestetik, Blues Hotsak jaialdian eskainiko duten saioa.