Eguaztenean egindako osoko bilkuraren amaieran, presak partzialki botatzeko egitasmoaren aurrean, EH Bilduko Unai Larreategi bozeramaleak jakinarazi zuen “oso kezkatuta” daudela kontu honekin. Larreategik adierazi zuenez, Udalari “arduraz” jokatzea dagokio eta Udal Gobernuari “lidergoa erakustea” dagokio. “Debate honek eskatzen duen inplikazioa eta arduraz jokatzeko jarrerarik ez da ikusten”, esan zuen.
Halaber, salatu zuen “utzikeria” ikusi duela Udal Gobernuaren aldetik, batik bat, martitzenean, gaiari buruz izan zen bilera publikoan udal ordezkaririk ez zela egon ikusita. Oro har, Larreategiren esanetan, udal modura ez dabiltza erremintak jartzen ari eta Udala ez dabil erantzukizunez jokatzen ari herriarendako horren inportantea den gai honetan. Gaineratu zuenez, laster EH Bilduk gaiari buruzko jakinarazpenen bat egingo du.
Bilera pertsonalak
Oposizioari erantzunez, Iker Aldazabal alkateak esan zuen martitzeneko tailerra herritarrei informatzeko zela eta ez duela horren argi ikusten Udalak han bere iritzia eman beharko zukeen ala ez eta ez duela garbi ikusten martitzeneko tailerra ote zen herritarren iritzia jasotzeko bidea ala beste moduren batera artikulatu beharko litzatekeen herritarren iritzia jasotzea.
Horrekin batera, alkateak gaineratu zuen, bere aldetik, egin dituela bilera pertsonalak tailerrean izan ziren hainbatekin eta besteak beste, haiei azaldu diela Hiri Antolamendurako Egitamu Orokorrak, “alderdi guztien artean adostutakoak”, gaiari buruz jasotzen duena.