Zentral eolikoa Karakaten

Elgoibarko Udalak Karakaten bi haize errota ezartzeko proiektuaren kontra egin du, aho batez

Elgoibarko udalbatza.

Elgoibarko Barren.eus-ek jakinarazi duenez, Elgoibarko Udalak Karakaten bi haize errota ezartzeko Green Capital Development 135 enpresak agertu duen asmoaren kontra egin du  aho batez, Karakate Bizirik plataformatik egindako eskaerarekin bat eginez.

Duela hilabete inguru jarri ziren harremanetan Karakate Bizirik plataformakoak Udal Gobernuarekin, proiektuaren kontra indarrak batzeko, eta ondoren, Udalean ordezkaritza duten gainerako alderdiekin ere izan dituzte batzarrak, mozioa "ahalik eta adostasun zabalenarekin adosteko".

Kontrako arrazoiak

Bost arrazoi aipatu zituzten plataformakoek Karakaten egin asmo dutenaren kontra egiteko: Karakateko mendi ingurua elgoibartarren aisialdirako "leku berezia eta kuttuna" dela; aurkeztutako aurreproiektua Elosua-Plazentzia estazio megalitikoaren mugetan sartzen dela; proiektuak Karakate-Irukurutzeta-Agirreburu babes bereziko naturgunean eragin zuzena izango zuela eta Elgoibarko Hiri Antolamenduko Plan Orokorrak espreski galarazten dituela parke eolikoak egitea; eta klima aldaketari aurre egiteko energia berriztagarriak sustatzea ezinbestekotzat jo arren, mota honetako proiektuek herritarren artean "ahalik eta kontsentsu zabalena" izan behar dutela eta ezin dutela herrietako ondarearen aurka egin.

Udal Gobernutik adierazi dute erraza izan dela aldeak ados jartzea eta Udalak orain arte adierazpen ofizialik egin ez badu, arriskurik ez zutelako ikusten izan dela. "Ez genuen gizartean sortu den egonezin hau sortu nahi aurrera egiteko biderik ikusten ez diogunean honi". Izan ere, eta Karakate Bizirik plataformatik adierazi bezala, Elgoibarko Hiri Antolamenduko Plan Orokorrean (HAPO) Karakate-Irukurutzeta mendilerroko Elgoibarko magala natura-intereseko gune izendatua dago eta HAPOn bertan zehazten dira inguru horietarako onartu daitezkeen jarduerak eta ez, debekatuta gelditzen direlarik parke eolikoak jartzea.

Era berean nabarmendu dute Energia Berriztagarrien Lurralde Plan Sektorialaren aurrerapen-dokumentuan ere jasota dagoela debekua, Karakateko gailurrerako eta Elgoibarko eta Soraluzeko mendi-magaletarako, ingurumenean duten eraginagatik. Karakaten hainbat elementu megalitiko daudela gogorarazi dute gaur osoko bilkuran onartutako mozioan (ikus hemen osoko bilkura, bideoan) eta egon daitezkeela aurkikuntza gehiago ere. "Soraluzeko udalerrian aurkitu berri diren zistek agerian uzten digute ingurune honetan oraindik aurkitu ezin dugun historiaren zati bat dagoela, eta aurkitutako elementu horiek interes kulturaleko ondasunak katalogatzeko prozedurarekin hasteko Soraluzeko udalerriak hartutako erabakia babesten dugu".

Plan Berezia bi hilabetean

Horregatik, proiektu horren kontra agertzeaz batera, bi hilabeteko epean Karakateko Parkea Antolatzeko Plan Berezia idazteko konpromisoa hartu du Elgoibarko Udalak, "udal-plangintzan jasotako zehaztapenak gehiago zehazteko". Plan horren helburua inguruko elementu naturalak eta megalitikoak babestea eta balioestea izango da. Era berean, Dolmenen Ibilbidea babesteko eta sustatzeko konpromisoa berretsi du Udalak, eta horretarako, udalerri mugakideekin hitzarmenak sinatu eta ibilbidea promozionatuko duela aurreratu du, bai eta estrategia horren barruan egiten diren arkeologia-prospekzioaK diruz lagunduko dituela ere. Eta horren harira, Elgoibarren idaztekoa duten planaren antzekoa idazteko proposatu diote Soraluzeko Udalari, "interes naturalistikoa duen eremu horri balio bateratua emateko".