Helduenak baino gehiago luzatu dira gaur, zapatua, Patria telesailerako umeen casting-ak, bereziki, hasierako azalpenen ondorioz, adinez txikikoekin kontu berezia izan behar delako. Kontuak kontu, pazientziaz hartu eta ordu eta erdiz-pare bat orduz luzatu dira ume eta guraso talde bakoitzari egindako saioak. 14:00etan zuten bukatzeko ordua, baina ordu horretan oraindik argazkiak ateratzen ziharduten.
15 hilabete-17 urte
Izan ere, helduenen castingean moduan, umeenean ere kopuru handia bertaratu da Batzokira, goizeko lehen ordutik: Bergarako, Elgoibarko, Markinako, Arrasateko, Oñatiko, Santurtziko… eta jakina, Soraluzeko familia ugari.
Hain justu, 15 hilabete zituen umetxo donostiarra izan da castingean izan den gazteena, eta 17 urteko oñatiarra, berriz, “nagusiena”. Hortxe erdian, denetariko adineko neska-mutikoek parte hartu dute.
Hemen ingurukoak eginda, bada, Donostian egin dituzte castingetarako hurrengo hitzorduak Yael Moreno Casting enpresakoek: Victoria Eugenia Antzokian izango dira, martitzenean, eguaztenean eta eguenean, 10:30etik 14:00ak arte eta 16:00etatik 20:30ak arte.