Goizeko argazkia errepikatu egin zen atzo arratsaldeko castingean, Batzokian: jende asko bertaratu zen, adin eta itxura guztietakoak eta Soraluzetik zein kanpotik etorritakoak; guztira 250 lagun inguru.
“Jende asko etorri da, profil oneko jendea, gainera. Eta pozik gaude alde horretatik. Baina figurante asko behar ditugu, grabazioetarako erabat libre egongo direnak. Eta Soraluzeko eta Elgoibarko kasuetan, gainera, grabazioetan behin baino gehiagotan parte hartuko dutenak, “figurante finkoagoak”, zelanbait esatearren”, esplikatu du Yael Morenok, castingeko arduradunak.
Beste hiru casting
Hori horrela, egunotan Elgoibarren, Soraluzen zein Donostian egiten dabiltzan eta egingo dituzten probetara bertaratzeko animatu nahi ditu herrikideak. Hain justu, gaur Elgoibarren izango dira 20:30ak arte bertako Kultura etxean. Eta zapatuan, berriz, 16 urtetik beherako gazteendako eta umeendako castinga egingo dute Soraluzeko Batzokian, 10:30ean hasi eta 14:00ak arte.
Castingetara joateko ez dago aldez aurretik zertan izena eman behar, bertan ere egin daiteke hori-eta. Hori bai, helduen zein umeen kasuetan, bietan behar dituzte Nortasun Agiri propioak izan.
Kantabriatik ere bai
Bitxikeria moduan, atzo arratsaldean, inguruko udalerrietakoez aparte (Eibar, Azkoitia…), Soraluzen izan ziren Kantabriatik etorritako hiru lagun ere, euren bizitzako “lehen” castingera etorri zirenak: “Ama (Nerea) Soraluzekoa dut, baina orain Laredon bizi naiz. Han antzerki tailer batean nabil, eta neu eta Kevin eta Aaron etorri gara Laredotik, Gamatik eta Ampuerotik castinga egitera. Lehenago ere telebistako erreportajeren batean ibilitakoak gara. Baina hau da gure lehen castinga”.
