Bihar, zapatua 13:00etan itxi egingo dute Etxaburueta kalea zirkulaziorako, Erregetxera bitartean. Eta horrelaxe izango da asteburu osoan. Erabaki hori hartu du Soraluzeko Udalak kontuan hartuta ibilgailuendako badagoela beste ibilbide alternatibo bat: Santa Ana kaletik Kalebarrenen barrena eta Gabolatseko zubitik ateratzeko.
Modu horretan, itxiko duten Etxaburuetako kale zati hori oinezkoendako eta tabernetako terrazak jartzeko erabili ahalko da.
Seinaleak egokitzen
Hortik aparte, udalerrian izandako zirkulazioaren aldaketen bigarren eguna ere normal antzean joan da. Lehen egunean antzeman zituzten gabeziak hobetzen jardun dute gaur, eta seinaletika egokitzapenak egin dituzte, batez ere. Iker Aldazabal alkateak adierazi duenez, datozen egunotan ere atzematen dituzten edo herritarrek jakinarazten dizkieten hutsuneak konpontzen joango dira.
