Geltokia Errabaletik aldatu nahi du Udal Gobernuak, han leku nahikorik ez dagoelako markesina, jarlekuak… ipintzeko. Eta Udal Gobernuaren ustez Baltegieta da lekurik aproposena, "egon litezkeen alternatibak aztertu eta gero".
"Modurik demokratikoena"
Hori guztia eta Errabaleko obren nondik norakoak azaltzeko batzarra egin zuten antzokian, baina, hartutako erabakiak eztabaida handia sortu zen.
Hori ikusita, Udal Gobernuak herri-galdeketa egitea erabaki du: "Debatea sortu dela ikusita, eta geltokia Gila zubian ipintzearen aldeko ahotsak entzunda, hausnarketa sakona egin dugu eta herri-galdeketa loteslea egitea erabaki dugu, herritarrek erabaki dezaten zein den geltokiarendako kokalekurik egokiena: Errabal, gaur egun dagoen lekua; Zubi Nagusia edo Baltegieta (…) Uste dugu soraluzetar mordoari zerbitzua ematen dion azpiegitura publiko baten kokalekua erabakitzeko modurik gardenena eta demokratikoena dela, eta horregatik ahotsa eman nahi diegu soraluzetarrei".
Beraz, hiru aukeren abantailak eta desabantailak mahaiaren gainean ipiniko dituzte, herritarrek informazio guztia izan dezaten.
Lana "hobeto" egin
Oposizioko EHBildu koalizioak, berriz, uste du lana lehenagotik egin ahal zela "hobeto": "EAJk eta PSEk kiroldegiko aukerarekin itsututa pasa dute legegintzaldi guztia.
EHBilduk zein herritar askok eskatu izan dugu beste aukera batzuk aztertzea, baina esan izan zaigu kiroldegikoa zela aukera bakarra. Batzarrean ere argi utzi zuten ez zutela inolako aldaketarik egingo.
Zergatik proposatu dute bat-batean galdeketa? Hauteskundeak gertu daudela eta beldurtu egin dira? EHBildu ez da sekula herritarrei galdetzearen kontra jarriko, baina orain arte lana hobeto egin izan balitz, orain ez ginateke egoera honetan egongo".