Orain arte Soraluzeko, Bergarako eta Elgoibarko Udalek 2.500 eurona ipini izan dute, Dolmenen Ibilbidea proiektua garatzeko ekarpen modura. Alkateak atzo esplikatu zuenez, baina, “ekarpena handitzeko proposamena” egin zien Soraluzeko Udalak aipatutako udalerriei, eta haiek onartu egin zuten. Hori horrela, aurrerantzean udal bakoitzak 7.000 euroko ekarpena egingo dio proiektuari.
Eta hain justu, kopuru hori jasotzen zuen hitzarmen berria zen atzoko osokoak aho batez onartu zuena.
Diputazioaren laguntza
Horrez aparte, gai berarekin lotuta, alkateak jakinarazi zuen Eusko Jaurlaritzako Kultura Sailera egindako diru-laguntza eskaera ukatu egin zain arren, Gipuzkoako Foru Aldundiak 8.880 euroko diru-laguntza onartu duela dolmenetan indusketak egiteko.
Eta gaineratu zuen beste laguntza batzuen gaineko erantzunaren zain ere badaudela: Erein diru-laguntzak, “horiek dira inportanteenak, eta oraindik ez da ebazpena irten”, esan zuen Aldazabalek.
Izan ere, proiektuari emango zaizkion diru-laguntzek baldintzatuko dute Dolmenen Ibilbidearen proiektuaren garapena.
Indusketak, bisitak…
Asmo orokorra da dolmenen indusketak egitea, Bergarako lursailetan dagoen Kerexetaegi hegokoa trikuharria berreraikitzea, iazko bisita gidatuak errepikatzea “ikusita zelako arrakasta izan zuten”, eta komunikazio eta seinaletika aldetik “dolmenak ikustarazteko ekarpen inportantea egitea”. “Proiektu indartsua da, Aranzadi Zientzia Elkartearekin egingo dena”, jakinarazi zuen alkateak.
