Giro ederrean joan dira San Andresko jaiak

Egunotan herritar asko hurreratu dira San Andres auzora. Azoka eta pilota txapelketa zapatuan, eta mendi lasterketa eta harrijasotzaileen txapelketa domekan, izan dira ekimenik jendetsuenetakoak. Argazkiak: Fernan Oregi. 

Auzoko baserritarrek prestatutako azokarekin hasi ziren jaiak zapatuan. Ganaduak, erremintak, sendabelarrak, loreak eta bestelako hainbat postu ezarri zituzten. Eguraldia lagun, jende mordoxka hurreratu zen eta aurreikusitako ekitaldi guztiak burutu ziren arrakastaz. Umeendako sendabelar, landaketa eta talo ikastaroan, esaterako, berrogeiren bat umek parte hartu zuten.

Arratsaldean, Asier eta Iñakiren pilota txapelketako partiduetara jende asko hurreratu zen eta gauean laurogei lagun inguruk afaldu zuten frontoian. Ostean, ez zen falta izan tirikiti hotsik eta dantzarik goizeko ordu txikiak arte. 

Domekan ere, goizean goizetik jende asko hurreratu zen auzora eta parte hartze handia izan zen kirol ekitaldietan.

Mikel Lopetegik errekor berria 

Domekan, San Andresko Harria Txapelketan errekor berria ezarri zuen Mikel Lopetegi Urra zarauztarrak. 100 kiloko harriari 45 jasoaldi eman zizkion bost minutuko tartean, eta, horrenbestez, 2014tik 44 jasoalditan zegoen errekorra (Jesus Mari Iruretagoiena "Izeta"-k jarritakoa) gainditu zuen jasoaldi bat gehiago emanda. Bigarren, Imanol Albizu Goikoetxe elgoibartarrak egin zuen 42 jasoaldirekin, hirugarren Jose Urrutia leitzarrak 37 jasoaldirekin, eta laugarren Gorka Etxeberria oriotarrak 34 jasoaldirekin.  

Boletako lehen saria Sergio Rodriguezek  

Berrogeita hamar lagunek baino gehiagok parte hartu zuten domeka arratsaldeko bola-tiraldi mixtoan. Bertan, Sergio Rodriguez eibartarra nagusitu zen sei txirlo botata. Txirlo koru bera bota zuten Segundo Pagaldai markinarrak, Enaitz Oruesagasti auzotarrak eta Mateo Goenaga markinarrak ere, baina berdinketa hausteko tiraldia hurrengo postuetan sailkatu ziren hurrenez hurren. Enaitz Oruesagastik lehenengo auzotarraren saria ere eskuratu zuen. 

Zozketa

Lehen eta bigarren sariak zozkatu zituzten domekan eta ondorengoak izan ziren zenbaki sarituak:

1. Saria. Saskia. 1808. Ordezko zk. 2000.

2. Saria. Bi jatordu Batzoki jatetxean. 2564. Ordezko zk. 2148. 

 

Erlazionatuak

Domekako argazkiak

Soraluze

Domekan San Andresen argazkiak jaso ditugu bilduma honetan. 
Astelehena, auzotarren eguna

Soraluze

Atzokoa izan zen San Andres jaietako azken eguna. Ohikoa den moduan, umeendako jolasak, bertsolariak eta emakumezkoen bola jokua egin ziren, eta I&...
Iosu Unanuek eta Jurgi Rasconek irabazi dute pilota txapelketa

Soraluze

Kirol ikuskizun ederra eskaini zuten herriko pilotariek San Andresen. Finaleko partiduan Iosu Unanue eta Jurgi Rascon gailendu ziren 22 eta 17, Jon...
Juan Rodriguezek irabazi du Iñaki Ruiz Mendi Lasterketa

Soraluze

Gizonezkoetan ia-ia iazko podium berbera errepikatu da Iñaki Ruiz Mendi Lasterketaren VII. edizioan, helmugaratu diren lehenengo biak izan d...