Abian da Errigoraren udaberriko kanpaina Nafarroa Hegoaldeko produktuak eskatzeko

Nafarroa Hegoaldeko zenbait produktu.

Nafarroan ekoiztutako oliba-olio birjina estra, arroza, pasta, lekaleak eta kontserbak eskatzeko epea zabaldu du Nafarroa hegoaldeko ekimenak. Eskaerak martxoaren 30era bitartean egin daitezke Errigora.eus webgunean. Gero, eskatutako produktuak maiatzaren 13an jaso ahalko dira Soraluzen bertan. Plaentxia.eus-ek bost litroko bi olio bidoi zozkatuko ditu eskatzaileen artean (eman izena HEMEN). 

"Nafar hegoaldeko uzta eskutik eskura kanpaina gure eguneroko kontsumo ohiturez harro egoteko bide bat da: Nafarroa hegoaldeko produktuekin urte guztirako despentsa betetzea proposatzen dizugu, ekoizlearen jatorrizko prezioan eta euskaraz etiketatuta produktuok zure herrian jasotzeko aukera emanez", agertu dute Errigora egitasmoaren arduradunek.

Orain, udaberriko Nafar hegoaldeko uzta eskutik eskura kanpaina jarri dute abian, eta oliba olio birjina estra, arroza, pasta eta kontserbak eskatzeko epea zabaldu dute. Martxoaren 30era arte iraungo du kanpainak, eta eskaerak Errigoraren webgunearen bidez zein telefonoz egin daitezke (errigora.eus webgunean edo 848-87 12 23 telefono zenbakian).

Errigorako udaberriko produktuak Soraluzetik eskatzen dituztenek maiatzaren 13an jaso ahalko dituzte produktuak, arratsaldeko 18:00etatik 20:00etara bitartean, Gaztetxean. Ordainketari dagokionez, berriz, online eginez gero, bi zatitan ordaintzeko aukera eskainiko dute. Bestela, dena batera ordaindu beharko da, eskudirutan, produktua jasotzerakoan. 2021ean, Soraluzetik 44 eskaera egin ziren, guztira, 9.700 euroko balioa izan zutenak.  

Soraluzen, Iratxo Goxodendak, Arranoak eta Pil-pilean Euskaltzaleen Elkarteak bultzatzen dute Errigora ekimena. 

Hazi, baina ez edonola

"Asmo handiak izanagatik, oinak lurrean ditugu. Hazi egin nahi dugu, bai, baina ez edonola. Errigoraren komunitatea koskortzen ari da, eta gero eta produktu gehiago eskatzen dizkio Nafarroako baratzeari. Baina, plateretik baratzerako bidea ezin da izan autobide bat, ezpada bidezidor eder bat. Izan ere, gure xede nagusietakoa da, emeki-emeki, bestelako ekoizpen eta banaketa ereduak ohiko bihurtzea", adierazi dute egitasmoaren arduradunek.

Horretan ari dira azken urteotan, Errigorarekin bat egin duten milaka herritarren ekarpenak ekimenaren asmoak betetzera bideratuz, hala nola lur eremu berriak jarri dituzte bestelako ereduen esku; kanpotik ekartzen zituzten produktuen ekoizpena bertan, Nafarroan, berreskuratzen lagundu dute; hainbat ekoizleri ekologikora trantsizioa egiteko bultzada eta babesa eman diote; eta euskarari olio errota eta kontserba etxeetako ateak zabaldu dizkiote. "Bistan da hori guztia ez dagoela egun batetik bestera egiterik, eta oraindik bide luzea dugu elikadura burujabetzara, baina, sarri esan dugun bezala, ekoizteko erak aldatzeko bide eraginkorra izan daiteke kontsumitzeko modua aldatzea", adierazi dute Errigorako kideek.