Abenduaren 22an, 10:00etarako jarriko dute azoka solidarioa Plaza Zaharreko karpan eta 13:00ak arte izango da zabalik. Ekimenaren helburua da kontsumo arduratsua, berrerabilpena eta ekonomia zirkularra sustatzea. Hain justu, Eskola Agenda 2030 programaren baitan gauzatuko dute azoka, Debegesarekin eta Soraluzeko Udalarekin elkarlanean.
Hori horrela, erabilitako gauzak batuko dituzte Institutuan abenduaren 18ra bitarteko jolas-orduetan; mahaia ipini dute horretarako. Eramaten den produktu bakoitzeko, puntuak emango dizkiete ikasleei, dirua erabili beharrean, azoka solidarioan puntuak erabili beharko dira-eta produktuak eskuratzeko. Atzo hasi ziren bilketa-lanak egiten eta dagoeneko batu dituzte hainbat jolas, liburu, oinetako zein arropa.
Horrez aparte, abenduaren 22an, institutuko 4. mailako ikasleek pintxoak eta errifak salduko dituzte ikas-bidaiarako, eta, erostearen truke, azokarako puntuak banatuko dituzte. Hartara, ikasleek ez ezik, edozein herritarrek eskuratu ahal izango ditu puntuak eta azokako produktuengatik trukatu.
20 urte lanean
Debegesak, Debabarreneko garapen agentziak, hogei urte daramatza eskualdeko udalekin elkarlanean Eskolako 2030 Agenda proiektua bultzatzen eta koordinatzen. Eskola Agenda 2030 garapen jasangarrirako hezkuntza-programa bat da, eskola-komunitateari zuzendua. Proiektuak hiru helburu ditu:
- Ikastetxeak ingurumen- eta gizarte-jardunbide egokien eredu bihurtzea.
- Ikasleak heztea, ingurumen- eta gizarte-arazoak identifikatzeko eta konpontzeko gai izan daitezen.
- Hezkuntza parte-hartzailea eta ingurumenarekiko errespetuzkoa bermatzea.