Julio Mendikutek teknika berezia erabiltzen du bere eskulturak lantzeko. Halaxe esplikatu zion Plaentxia.eus atariari Oreka Art galerian egin zuen lehen erakusketan: “Egurra lantzeko Shou Sugi Ban teknika ezagutu nuen interneten bidez eta interesgarria iruditu zitzaidan. Egurra iraunarazteko teknika japoniarra da. Lehenik egur zati bat aukeratzen dut, gero erre egiten dut eta lixatu ostean, olioa eta argizaria ematen dizkiot, edertzeko. Batzuetan urre kolorea ere gehitzen diot urre xafla mehe bat erabilita”.
Urtarrilaren 6ra bitartean
Eskulturak ez ezik, kimigramak ere baditu Mendikutek. Orain eskulturagile bada ere, lehenago argazkilari izan zen, eta hain justu, argazkilaritzan erabiltzen den teknika batekin egindako lanak dira horiek: “Eskuz egindako irudiak dira, fotografiarako erabiltzen diren sustantzia kimiko batzuek erabilita, paper fotografikoaren gainean”.
Barikuan, 19:00etan inauguratuko dute erakusketa eta ikusgai izango da 2026ko urtarrilaren 6ra bitartean.