Bonbardaketa-sirena hotsek inguratuta egin dute gaur goizean Palestinako genozidioa salatzeko elkarretaratzea Plaza Barrixan. 40-50 lagun inguruk parte hartu du, ikasle-irakasleen kasuan, bakoitzaren ordutegiak lagatakoaren arabera egokituz presentzia.
Bestalde, datorren asterako LAB, CCOO, UGT, ESK, STEILAS, CGT, Etxalde eta HIRU sindikatuek mobilizazioak zein lanuzteak deitu dituzte.
Langileei dagokienez, 11:00etatik 14:00ak arteko lanuzte orokorrak deitu dituzte, eta bestelako hiru orduko lanuzteak proposatzen dituzte txandakakoentzako -03:00-06:00 eta 19:00-22:00- zein goizeko lanaldia 15:00etan amaitzen dutenentzako -11:00etatik 15:00etara-.
Bestalde, hezkuntzan, haur eskoletatik hasi eta unibertsitate mailaraino, egun osoko greba deitu dute LABek, Steilasek, ELAk eta Ikasleen sindikatuak.
- Protestek honako helburu orokorrak dituzte:
- Langile klase osoaren elkartasuna adieraztea Palestinako herriarekin.
- Israel Palestinako herriaren aurka, AEBetako Gobernuaren babesarekin, egiten ari den genozidioa eta gizateriaren aurkako krimenak salatzea.
- Zisjordanian Palestinako lurraldearen etengabeko kolonizazioa salatzea, eta horrek langile palestinarren lan- eta bizi-baldintzetan dituen ondorio larriak.
- Gazako genozidioaren berehalako amaiera eskatzea eta okupazioa eta kolonizazioa amaituko dituen eta Palestinako herriak askatasunean bizitzeko eskubidea bermatuko duen konponbide integrala exijitzea.
- Patronalari eta instituzioei, bertakoei zein nazioartekoei, Israelekin harreman komertzial oro eteteko eskatzea. Ezin da genozidio baten kontura negozioa egiten jarraitu.
- Europar Batasuna-Israel Elkartze Hitzarmena osorik eten dadin eskatzea.