“Palestina bizitzen ari den sarraskia salatu eta elkartasuna adierazteko” deitu du biharko elkarretaratzea Soraluze BHIko irakasle taldeak. 11:00etan da hitzordua Plaza Barrixan, eta, hezkuntza komunitate osoari dei egin diote elkarretaratzean eurekin batera parte har dezaten, tartean, gurasoei.
Institutuko ikasleei dagokienez, Ikasle Sindikatuak egindako deiarekin bat egin eta bihar, eguena, greba egingo dute. “Palestinako herriaren aurkako genozidioa” salatzeaz batera, “Israelekin harremanak apurtzea” eskatuko dute.
Netanyahuk nazioarteko ultraeskuinaren babesa
Ikasleek helarazitako deialdian gogora ekarri dute “Netanyahuren gobernuak 60.000 palestinar baino gehiago hil” dituela, “horietatik 18.000 haurrak eta arma gisa baliatutako goseteak herritarren %25i eragiten” diela.
Halaber, salatu dute Netanyahuk “AEBko inperialismoaren eta Donald Trumpen baliabide ekonomiko eta militar guztiak” dituela eskura “baita nazioarteko ultraeskuinaren babes sutsua ere”.
Diotenez horren barruan “Vox eta PP sartzen” dira. “Baita EAJ ere, argi erakusten baitu Israelen aldeko babesa, islamofobia eta etorkinen komunitatearen aurkako gorroto arrazista, eta noski, CAF edo Irizar bezalako enpresak, sionismoarekin negozio mardulak egiten dituztenean”. Eta Espainiako estatuari dagokionez, berriz, “PSOE-Sumarren gobernuak hizkera bikoitza erabiltzen” duela uste dute, hitz politetatik harago, ez dituztelako Israelekin dituzten “harreman komertzial, diplomatiko eta militarrak apurtzen”.
Eta azpimarratu dute eurek ez dutela “ez ikusiarena egingo. Palestinar auzia gizateriaren eta giza eskubideak eta justizia soziala defendatzen” dutenen auzia delako.