Gaurtik barikura arte, protestan ibiliko dira Mesedeetako egoitzako langileak, Gipuzkoako bestelako egoitzetako langile askorekin batera. ELA eta LAB sindikatuek deituta, oro har, lan jardun osoko kontratuak eskatzen dituzte, salatuz, egoitzetako “langileen erdiak borondatezkoak ez diren lan kontratu partzialak” dituztela. Diotenez, azken lau urteotan “izugarri ugaritu” egin dira mota horretako kontratuak.
ELA sindikatuak jakinarazitakoaren arabera, “azpikontratatutako langileen kasuan, kontratu partzialak %45 dira”. Beste hiru datu bat ere eman ditu. Batetik, egoitzetarako langileen “zerbitzu horiek lizitatzeko atera dituen azken 9 pleguetako informazio publikoa aztertu du sindiaktuak, eta ondorioztatu du langileen %55ak kontratu partziala duela”.
Bestetik, Gipuzkoako patronal handiena den Matiak 1.300 langile dituela eta %50k kontratu partziala duela eta hirugarrenik, Biharko Gipuzkoa enpresak 900 langile inguru ditu eta “%60k kontratu partziala” duela.
Langile prekarioak
Oro har, sindikatuak salatu du “kontratu horiek diru publikoarekin mozkinak biderkatzeko eta soldatak ez aplikatzeko mekanismoa” direla; baita “langileak menpeko eta prekario bihurtzekoa” ere. Diotenez, “lanaldi osora gerturatu ahal izateko, enpresek erabateko disponibilitatea eskatzen diete ordu osagarrien bidez. Egutegien malgutasun horrek kontziliazioa eta bizitza duin bat izatea oztopatzen du”.
Horregatik guztiagatik, %100eko lan kontratuak eskatzeko eta soldata arrakalarekin amaitzeko eskatuko dute protesta eginez, zehazki, Eider Mendoza aldun nagusiari eskatuz “aurrekontuetako eztabaidan gaia erdigunean” jar dezala.
Bihar Plaza Berrian
Grebarekin batera, mobilizazioak ere egingo dituzte datozen egunotan. Esaterako, gaur, eguaztena, Donostian manifestazioa egiteko hitzordua dute eta bihar, eguena, Soraluzeko Plaza Berrian elkarretaratzea deitu dute 19:30ean.
Azkenik, gaur egitekoak ziren Mesedeetako Amaren ospakizunak egunez aldatu dituzte egoitzan. Jakinarazi dutenez, urriaren 6tik 9ra bitartean ospatuko dute egoitzako zaindariaren eguna.