Zapatuan, 11:30ean hasiko da Beteranoen Eguna Ezoziko futbol zelaian. Besteak beste, bertan izango dira Eibarko Putre Zaharrak taldeko, Iruñeko Sai-Zaharrak-La Ünica, Bera-Berako zein Katalunia aldeko Alellako beteranoak. Eta haiei gehituko zaizkie herriko jokalari ohiak.
Errugbi topaketan hiru partida jokatuko dituzte, 20 minutukoak. Lehen bi zatietan elkarren kontra jokatuko dute beteranoek. Azken 20 minutuak, berriz, gurasoen, jokalarien, umeen, entrenatzaileen… artean bi talde osatu eta partida jokatuko dute.
Herritarrendako gonbidapena
Topaketa borobiltzeko, frontoian paella-jana egiteko asmoa dute, Enekoitz Igartua SoraGazteak Rugby Klubeko ordezkariak jakinarazi duenez, aurreikuspena da 60 bat lagun elkartuko direla. Halaber, Igartuak soraluzetarrak ere animatu nahi ditu bertaratzera. “Ez bakarrik gazteak eta kirolzaleak, helduendako aukera ere badago”, ikusteko zein parte hartzeko, “ze azkeneko partidan ez da behar ezer, ondo pasatzeko gogoa bakarrik”, dio.
Zenbaki irabazlea
Bestalde, asteburuan errifak saltzen ibili dira SoraGazteak Ruby Klubekoak. Enekoitz Igartuak esan du klubeko gastuei aurre egiten laguntzea dela helburua. Esplikatu duenez, aurtengo denboraldian lau kategoria izatean, desplazamenduak ugaritu egin dira eta horiek bermatzea dute helburu. Gainera, 16 urtez azpikoak federatuta daudela-eta, Igartuak esan du saiatuko direla ere haien fitxen zati txiki bat klubak bere gain hartzen eta hartara, “errugbian jarraitzea erakargarriagoa egiten”.
Hona hemen zenbaki sariduna eta erreserbakoa. Barikuan saldu zen. Irabazlea Igartuarekin jarri behar da harremanetan: 676890475. 15 egun ditu horretarako.
