14 talde izanda, zazpiko bi grupo osatu dituzte aurtengo Futbito Txapelketan. Aste honetan 4. jardunaldia jokatu dute, eguenean eta herenegun, barikua izan ziren partidak. Antolatzaileek esandako moduan, “ahal denean” ipintzen dituzte partidak, kiroldegiko frontoia libre dagoenean, alegia.
Honako taldeak ari dira lehian:
- Drink Team
- El Rincon
- Goenetxetxo
- Jubiletak
- Kastakuak
- LCE
- LMA
- LTC
- LTC All Stars
- Marsora
- Nothingam Miedo
- Salabardo
- Star Boys
- Union Futbol Sala
Betiko formatu berean gauzatuko da aurtengo txapelketa. Hori horrela, lehen 7 jardunaldiak pasa ondoren etorriko dira laurdenak, finalerdiak eta finalak. Liga-finala izango dute sailkapenaren erditik gora geratzen direnek eta gainerakoek Kopa finala. Hain justu, Kopako finala izango da uztailaren 24ko jaietako txupinazoa baino lehen eta Ligako finala txupinazoaren ondoren.
"Lasaitasunez" jokatzeko eta animatzeko eskaera
Futbito txapelketak bete egiten du kiroldegiko frontoia ikuslez eta txapelketa bizi-bizia izaten da; batzuetan tentsio handiegia ere somatzen da, jokaldi gogor eta guzti. Zentzu horretan, antolatzaileek azpimarratu nahi dute “dibertitzeko” txapelketa bat dela, “heziketa futbolaren gainetik” dagoela eta beraz, lasaitasunez jokatzeko eskatu diete partaideei. Ildo beretik, lasai jarduteko eta animatzeko eskatu diete, baita ikustera doazenei ere.