Asteon, gutunak bidali dizkie pentsiodunen mugimenduak Bildu, Sumar, PP, EAJ eta PSE-EE alderdiei, baita Lehendakariari ere. Uste dute haren alde batutako 145.000 sinadurek “entzutea merezi” dutela. Halaxe azpimarratu zuten asteleheneko elkarretaratzean.
Bestelako gaien artean, berriz, jakinarazi zuten gizonek 1.800 euroko kalte-ordainak eskuratu ditzaketela ekarpen demografiagatiko amatasun-osagarrirako eskubidea aitortuta. Orain arte, emakumeek bakarrik zuten eskubide hori baina 2019ko epai batek gizonei ere aitortu diete eskubidea.
Azkenik, asteleheneko batzarrean salatu zutenez, 750 milioi euro baino gehiago fakturatzen dituzten enpresek %1,34 ordaintzen dute zergetan batez beste. Eta Espainiako 23 multinazionalek %5 baino gutxiago ordaintzen dute euren etekinengatik.
Gogora ekarri zutenez, duela urte batzuk, Ekonomia Lankidetza eta Garapenerako Antolakundeak (ELGA) ezarri zuen multinazionalek gutxienez beren irabazien %15eko tasa efektiboa ordaindu behar zutela. Baina gaineratu zuten, hori ez duela “ia erakunde bakar batek ere errespetatzen, eta erakunde politiko edo zerga-agentzia bakar batek ere” ez duela “neurririk hartzen eta ez du eskurik sartzen ez-betetze horren aurrean”.