Soraluze Udalak aho batez onartu zuen Soraluze etxebizitza merkatuko tentsio-eremu izendatzeko eskaera formala egitea. Tentsio-eremu izendatzeko ezarritako irizpideetako bat betetzen du Soraluzek, alegia, 2018tik 2023ra %19,6 baino gehiago igo dela alokaiuraren prezioa. Soraluzeren kasuan, %19,9 egin du gora.
Bada, tentsio-eremu izendatzeak ekarriko du, besteak beste, “alokairu-merkatu horretan esku hartzeko” aukera izango dela, horixe baita “tentsio eremuaren izendapenaren, 12/2013 Legearen neurrietako bat”.
Horrekin batera, ahalbidetuko du “alokairu-errenten hazkundearen gaineko kontrola”, eta ahalbidetuko du baita ere muga bat “kasu jakin batzuetan, errentak finkatzeari dagokionez”.
Hiru urterako plana
Zuzenean aplikatu daitezkeen neurri horiez gainera, eguenean onartutako mozioaren arabera, “tentsionatutako eremu izendatzeko eskaerak, Udalari eskatzen dio, baita ere, etxebizitza plan bat egitea”. Plan horretan 3 urterako neurri espezifikoak jaso beharko dira, “egoerari aurre egiteko jarduketak zehaztuko” dituztenak.
Zehaztutakoaren arabera, “neurri horiek erakundeen arteko lankidetza eskatuko dute Eusko Jaurlaritzarekin eta Gipuzkoako Foru Aldundiarekin, eta horien artean arrazoizko prezioan alokairuko etxebizitzak kudeatzaile publikoen bitartez merkaturatzeko politikak bultzatzea sartzen da”.
Osoko bilkuran jakinarazi zutenez, Etxebizitza Plana egiteko, besteak beste, erabiliko dituzte Aztiker Soziologia Elkarguneak etxebizitzei buruz egindako diagnostikoa zein Udal Gobernuaren ekimenez, etxe hutsen jabeekin egin den lanketaren emaitzak.