Gipuzkoako Foru Aldundiko Kultura Eskola ekimenaren baitan ari dira murala margotzen Araneko paretean. Eneritz Muguruza Institutuko zuzendariak esplikatu duenez, Diputazioko ekimen horren baitan tailer eta ekintza mordoa egiteko aukera dago. Lehenago, euskararekin lotutako tailerra egin zuten eta orain, murala egitea aukeratu dute, gazteei “zerbait desberdina” egiteko aukera eskaintzeko.
Muralari dagokionez, bi muralgileren gidaritzarekin dihardute guztia egiten. Atzo, muralaren diseinua egin zuten institutuan, Mikel Larrañaga REMAK eta Jokin Oregi Sortwo muralgileen gidaritzapean. Gaur marrazten hasi dira eta bihar bukatuko dute.
Bi muralgileek esplikatu dutenez, murala eginez, esparru artistikoa lantzeaz aparte, gazteek aukera dute ikusteko beste lanbide batzuk ere badaudela, kasu honetan muralista izatea. Are gehiago, aukera dute ikusteko posible dela hobbie bat lanbide bilakatzea, Mikel Larrañagak eta Jokin Oregik egin duten moduan.
Oregik, Ikus-entzunezko ikasketak egin arren, bederatzi urte daramatza muralgile modura; adibidez, Soraluzeko skate-parkeko murala berarena da. Larrañagak, berriz, arkitektura ikasketak izan arren, bost urte daramatza muralista izaten.