Mobilizazioak eginez eta mobilizazioak iragarriz joan dira udaberriko oporretara pentsiodunen mugimenduko kideak. Joan den astean, Soraluzen ez ezik, Euskal Herriko hiriburuetan eta Eibarren egindako manifestazioetan ere parte hartu zuten, Soraluzeko ordezkaritzaren kasuan, Eibarko mobilizazioan.
“Pentsio eta gutxieneko soldata justu eta nahikoaren alde” mobilizatu ziren, gogora ekarriz “ehunka mila” direla “oinarrizko beharrak bete ezin dituzten euskal herritarrak. Pentsio baxuak edo eskasak jasotzen dituzten pentsiodunak; eta estatu mailan ezarritako lanbide arteko gutxieneko soldata (LGS) duten langileak, bizitzaren kostuari aurre egin ezin diotenak”; halaber, jakinarazi zutenez, alargunen euskal federazioak ere berriki adierazi du “pentsio gehienek ez dutela bizitzeko ematen, eta ikusezin daudela”.
Soraluzeko mobilizazioan, berriz, Herri Ekimen Legegilearen alde egiten ari diren sinadura bilketa izan zuten hizpide, esanez, dagoeneko 110.000 sinadura baino gehiago lortu direla eta iragarriz sinadurak batzen segituko dutela; horretarako mahaiak jarriz udalerrietan, baita Soraluzen ere.
Sinadura horiek guztiak maiatzaren 15ean aurkeztuko dituzte Gasteizko Legebiltzarrean, "Araba, Bizkaia eta Gipuzkoako pentsiodunen manifestazio indartsu baten babes eta bermearekin".