Jardunaldi eta talde guztiak kontuan hartuta, denboraldiko etxez kanpoko emaitzarik onena lortu zuen Sorak pasa den asteburuan: 0-5 markagailuan bukatu zuen Seguraren kontrako partida. Guzti hori, gainera, lehen zatian 10 jokalarirekin geratuta, epaileak Beñat Arini txartel gorria atera ostean. Gol bana sartu zuten Markel Gilek eta Oihan Larrañagak —azken honek penaltiz, partida amaitzear zela—, baina benetan nabarmendu zen jokalaria Antxon Zubiaurre izan zen, gainontzeko golak sartu eta hat-trick-a lortuz.
Gaur, apirilaren 12an, etxean daukate hitzordua Sorako mutilek. Lazkao K.E. hartuko dute Ezoziko futbol zelaian, 16:30ean. Lazkaotarrak sailkapenean Sora baino gorago (erdigunean) dauden arren, bolada txarra izan dute azkenaldian: Jokatutako azken bost partidak galdu dituzte, bai kanpokoak (2), bai etxekoak (3). Aurkariaren momentuko ahultasuna eta pasa den asteko emaitzak ekarritako indarberritzea aprobetxatu beharko ditu Sorak gaurkoan, sailkapenean gora egin eta behingoz salbu egotea lortzeko.
Gainontzeko taldeen hitzorduak (aurkaria, tokia, ordua) Plaentxia.eus-eko Soraren blogean.