Gustura agertu dira Errigorako antolatzaileak aurtengo udaberriko Eskutik eskura kanpainaren balorazioa egin dutenean. Izan ere, azaldu dutenez, iazko kanpainarekin alderatuz, guztira 974 eskaera gehiago jaso dituzte, eta produktuei dagokienez, 17.530 litro oliba-olio birgina estra eta 4.655 lote gehiago banatuko dituzte aurten.
Antolatzaileen esanetan, 2025eko kanpainak "jauzi berri bat" suposatu du: "Errigoraren komunitatea urtetik urtera gehiago zabaltzen ari denaren erakusgarri dira kanpaina honen emaitzak" eta azpimarratu dute "kontsumitzaile arduratsuen sarea" hazi egin dela.
Maiatzaren 7an, banaketa Soraluzen
Soraluzeko Errigorak adierazi duenez, Soraluzetik egin den eskaera inoizko handiena izan da. Guztira, 54 herritarrek egin dute eskaria eta 13.673 euroko balioa duten produktuak eskatu dituzte. Produktu horiek maiatzaren 7an (asteazkena) jaso ahalko dituzte, arratsaldeko 18:00etatik 19:30era bitartean, Gaztetxean.