Zapatuan, hiriburuetan aldarrikatuko dituzte gutxieneko soldata eta gutxieneko pentsio bidezkoak

Ubane Madera Zangitu 2025ko api. 3a, 17:36

Etzi, zapatua, Euskal Herriko Pentsiodunen Mugimenduaren ekimenez, hiriburuetara eta Eibarrera eramango dituzte gutxieneko soldataren eta gutxieneko pentsio bidezkoen eta nahikoen aldeko aldarrikapenak. Mobilizazioek ia sindikatu guztien babesa jaso dute etabaita beste kolektibo batzuena ere. Eibarko manifestazioa 12:00etan hasiko da eta hainbat herrikide 11:25eko lineako autobusean joango dira.

Zapatuko mobilizazioak deitzeaz bat, asteleheneko elkarretaratzean jakinarazi zuten 110.000 sinadura pasa batu dituztela Herri Ekimen Legegilearen alde, “inoiz ikusi ez den zifra”. Eta uste dute babes horrek berorrek eskatzen duela Eusko Jaurlaritzak eta Eusko Legebiltzarrak HELaren tramitazioa, eztabaida eta ebazpena onartzea.

Bestalde, jakinarazi zuten EAEko (CONFEBASK) eta Nafarroako (CEN) patronalek uko egin diotela Espainiako gobernuak ezarritako LGS lanbide arteko gutxieneko soldataren zenbatekoa gainditzea ahalbidetuko duen gutxieneko soldata bat negoziatzeari eta uste dute beharrezkoa dela EAEn eta Nafarroan gutxieneko soldata altuagoa izatea. Zentzu horretan, babesa erakutsi zieten horren alde lanean ari diren erakunde sindikalei.

Funts pribatuen irabaziak

Azkenik, pentsio fondo pribatuak ere hizpide izan zituzten asteleheneko elkarretaratzean. 2024an “30.800 milioi euroko errekorra” pilatu dutela jakitun, funts pribatu horiek arbuiatu egin zituzten, “laguntza fiskalen bidez lagundutako pentsio-funts pribatuak direlako, enpresariek eta langileek Gizarte Segurantzari egiten dizkioten kotizazioak eta, ondorioz, pentsio publikoak ahultzen dituztelako, eta, aldi berean, hainbat langile-sektoreren artean bereizketak sortzen dituztelako”.

Halaber, uste dute lehentasunezkoa dela Gizarte Segurantzako kotizazioak defendatzea eta indartzea, izaera unibertsala duten pentsio publiko duinak hobetu eta lortzeko.