Euskal Eskola Publikoan ematen ari den gatazkarekiko kezka erakutsi asmoz, komunikatua plazaratu eta elkarretaratzea deitu du Soraluzeko guraso talde batek. Astelehenerako deitu dute protesta ekimena, eskola irteera ordurako, 16:25-16:40ra bitartean, eskola kanpoko biribilgunean.
Atxolin eta Keixeta herriko bi guraso elkarteek atxikimendua erakutsi diote ekimenari eta asteleheneko elkarretaratzean parte hartzeko deia egiten dute.
Oro har, komunikatu bidez, azpimarratu dute “kalitatezko hezkuntza publikoaren aldarriak erdigunean ikaslea izan behar” duela, eta diote eurek ere “horretan sakondu nahi” dutela.
Eskaerak
Honako eskaerak egiten dituzte:
“RATIOAK JAISTEA: Badakigu gure seme-alaben geletan gaur egun ematen diren ratioek ez dutela kalitatezko hezkuntza betek bermatu beharko lituzkeen helburuak betetzea ahalbidetzen.
ORDEZKAPENAK LEHENENGO EGUNETIK: Ez dugu ontzat ematen behar baino gehiagotan gertatzen diren ordezkapenen atzeratzeak, ikasleen erreferentziazkoak diren irakasleen hutsuneak ahalik eta arinen beteko direla bermatzea ezinbestekotzat jotzen dugu.
LANPOSTUAK EGONKORTZEA: Gure seme-alabek ikasturtetik ikasturtera izaten duten irakasle aldaketak ez dio inolako mesederik egiten hezkuntza-kalitateari. Beraz, ikastetxeetako lanpostuak egonkortzea ezinbestekotzat jotzen dugu, langile publikoetan ematen den interinitate tasa estrukturala murriztuz hezkuntzan ere.
INKLUSIOARI AURRE EGITEKO GIZA BALIABIDEAK: Ikasgeletako errealitateari aurre egiteko, baliabidez hornitu behar dugu hezkuntza sistema. Aniztasunari aurre egiten dieten figurak indartu eta ez daudenak ikastetxeetan txertatu behar dira (aholkulariak, orientatzaileak, espezialistak, psikologoak, etab.).
Kalitatezko hezkuntza publiko baten alde, familiak hezkuntza komunitate guztiarekin batera lan egitera eta egungo egoeraren aurrean adi egotera deitzen ditugu, ikasleak gatazka honen konponbidera bidean erdigunean egon daitezen.
GORA KALITATEZKO EUSKAL ESKOLA PUBLIKOA”.