Grebak EAEn izan duen jarraipen orokorrari dagokionez, berriz, sindikatuen esanetan %75ekoa izan da. Gaineratu dute mobilizazioetan ere “milaka langile” ari direla elkartzen. Eta adierazi dute egoera aldatu ezean, bide beretik segituko dutela.
"Grebetan jarraitzeko indarrarekin"
Honako mezuak helarazi dizkiote Hezkuntza Sailari:
- “15 urte direla hitzarmena eguneratu gabe; eta aski dela.
- Lan zamak arintzea, plantilak gazteberritzeko plan egokia ezartzea, enplegu publikoa kontsolidatu eta bermatzea, eros ahalmena berreskuratzea, lan osasuna zein euskara eta hezkidetza bermatzeko neurriak proposatzeko garaia dela.
- Ez badago aldarrikapen hauekiko erantzunik grebetan jarraitzeko indarrekin daudela”.
Hezkuntza Sailari “eduki, zehaztapen eta konkrezioak dituzten mahaiak deitzeko exijitzen” diote. Azpimarratu dutenez, “hezkuntza publikoa indartzeko ezinbestekoa da inbertsioa handitzea eta lan baldintzak hobetzea eta eskola publikoa baliabideez hornitzea”.
"Adostasuna eta elkarrizketa lortu nahi"
Eusko Jaurlaritzari dagokionez, atzo, Hezkuntza Sailak deitoratu egin zuen sindikatuek aste honetarako aurrikusitako irakasleen greba-egunak bertan behera utzi ez izana. Gobernuaren ustez, “horrek negoziazio-mahaiari berriro ekitea eta gure hezkuntza-sistema hobetuko duen akordio baten bilaketan aurrera egitea eragozten du”.
Azaldu zuenez, martxoaren 31rako aurreikusitako bilera teknikoa ezin izan zen egin, “foro horren edukia negoziazio-mahai nagusian lantzen ari diren gaien multzoaren parte delako, greba-egutegiaren jarraitutasunak baldintzatuta”.
Gaineratu zuenez, “proposamen zehatzetan aurrera egiteko, konfiantza eta egonkortasun-esparru bat behar da, elkarrizketa eta adostasunen bilaketa bultzatzeko, eta ikasleen ongizatea eta sistemaren kalitatea erdigunean jartzeko”.
Ildo horretatik, “Hezkuntza Sailak adostasuna eta elkarrizketa lortu nahi dituela berretsi zuen eta berriz ere sindikatuei eskatu zien elkarrizketa lehenesteko greba-deialdiaren aurretik, eta beste astebetez ikasleak eta haien familiak ez daitezen izan kaltetuak”.