Avanza autobus enpresan bost eguneko greba gaurtik hasita

Ubane Madera Zangitu 2025ko ots. 27a, 08:22

Gaur hasi, eguena, eta martxoaren 3ra arte Avanza Gipuzkoa enpresako langileek bost eguneko greba egingo dute. Langile Batzordeko ELA sindikatutik esandakoren arabera, ez dute enpresarekin “inolako akordiorik” adostu. Besteak beste, urteko lanordu kopuruarekin dute gatazka.

Gaur, goizaldeko 02:00etan hasi dute bost eguneko greba Avanza enpresako langileek. Hori horrela, datozen egunotan gutxieneko zerbitzuak bakarrik izango dira Avanzak Donostiara, Bilbora, Gasteizera, eta oro har, Debarroan eskaintzen dituen autobus zerbitzuetan. HEMEN KLIKATUTA ikusgai.

ELA sindikatutik jakinarazitakoaren arabera, herenegun, martitzena izan zuten langileen ordezkariek Avanza enpresako ordezkariekin batzarra, ordura arte enpresak ez baitzituen deitu, nahiz eta langileek otsailaren 12tik eskatuta izan batzarra egitea.

Ordu kopurua gatazka iturri

Esandakoaren arabera, negoziazio-mahaian duten puntu beroetako bat urteko lanordu kopurua da. Langileek urteko 1.592 lanordu eskatzen dituzte. Gainera prest daude ordu kopuru hori gutxika jaisten joateko.

ELAtik esandakoaren arabera, Gipuzkoako Diputazioarekin zein Jaurlaritzako Lan Delegaritzarekin egin dituzte gai horrekin lotutako bilerak eta Diputazioak ez die horretarako eragozpenik ipini. “Baina enpresatik kontrakoa diote; diote Diputazioa ez dagoela ados ordu kopuru horrekin; beraz, norbait gezurretan dabil, Diputazioa edo enpresa. Beraz, grebara goaz. Oraingoan, berezitasun batekin, UGT sindikatua greba deialditik desmarkatu egin baita”.