Lilatoia belaunaldiz belaunaldi

Ubane Madera Zangitu 2025ko ots. 23a, 18:49

Gaur, domeka, 35. Lilatoia korritu dute Donostian. Bertan parte hartzeko dortsala zuten 6.200 emakumeen artean soraluzetarrak ere izan dira. Horietako talde batek urtez urte dihardu elkarrekin parte hartzen emakumeen lasterketa herrikoian. Gaur ere halaxe egin dute eta kontatu dutenez, aurtengo Lilatoia "bereziki hunkigarria" izan da. Eurek idatzi dute gaur bizi izan dutenaren kronika. 

Urtez urte, herriko emakume talde batek ilusioz parte hartzen du Emakumeen Lasterketan, ekitaldi hunkigarria eta tradizio bihurtua. Lehiaketa baino gehiago, elkartasun eta batasunaren sinboloa da, eta aurten ere ez da salbuespena izan.

Lasterketa hasi aurretik, ohitura den bezala, parte-hartzaileak elkartu dira talde-argazkia ateratzeko. Une berezi eta zirraragarria da, belaunaldien arteko transmisioa agerian uzten duena. Urtez urte, aurpegi berriak agertzen dira, belaunaldi aldaketa islatuz. Aurten, bereziki hunkigarria izan da bi belaunaldi elkartzea: hainbat ama eta alaba elkarrekin irten dira korrika egitera, tradizioari jarraipena emanez.

Urteen poderioz, partaide askorentzat hasierako urduritasuna atzean geratu da, eta orain lasterketa bizitzeko modu berri bat dute: gozatu eta parte hartze hutsari balioa eman. Helburua ez da helmugara iristea bakarrik, baizik eta esperientzia partekatzea eta komunitatearen indarra sentitzea.

Lilatoia ez da soilik kirol proba bat, baizik eta belaunaldiak elkartzeko eta emakumeen ahalduntzea sustatzeko ekitaldi bat ere bada. Urtero, ilusio berrituz eta partaide berriekin, tradizio honek indar handiz jarraitzen du herrian.