444.844 bisita izan ditu Plaentxia.eus atariak joan berri den urtean, eta, 2023arekin alderatuz gero, %5,4ko gorakada izan du; egunean, bataz beste, 1.220 sesio izan ditu. Ikusitako orrialdeei dagokienez, 1.054.744 izan dira 2024an, %5,4ko igoera erregistratuta. Bestalde, aipagarria da bisita guzti horien %77 mugikorretatik egin dela. Hauek izan dira iazko albisterik ikusienak.
Trafiko gutxiago sare sozialetatik
Sare sozialetatik Plaentxia.eus atarira etorritako trafikoa ere garrantzitsua izaten da, baina, Behategiak emandako datuen arabera, 2024an 4 puntuko jaitsiera izan du. Iaz, zehazki 44.599 sesio etorri ziren sare sozialetatik (2023an, 58.428), trafiko guztiaren %9,9 (2023an, %13,7), %90 Facebook-etik. Alde horretatik, kontuan hartzekoa da iazko urtean zehar, Facebook-ek zailtasun gehigarri asko ezarri zituela Plaentxia.eus-eko albisteak publikatzeko, inolako azalpenik eman gabe, eta hori dela eta, sare sozial horretan publikatutako albiste kopurua txikiagoa izan zela.
Hain zuzen, Pil-pilean eta Tokikomeko tokiko hedabideak sare sozialen erabileraren gaineko hausnarketa betean dira eta datozen egunetan jakinaraziko dute zein izango den etorkizunean aplikatuko duten politika.