Urtea amaierako egun berezietan ere euskal presoak gogoan izango dituzte Sare Mugimenduak deitutako elkarretaratzean parte hartuz. Bihar, 19:30ean Plaza Berrian elkartu eta oro har, aldarrikatu nahi dute “gatazkak utzitako ondorioekin amaitzea premiazkoa” dela “euskal herritarrontzat, behar bat da sufrimenduak gehiago ez luzatzea”.
Ildo beretik, uste dute “eragile sozial eta politikoen, sindikatuen, alderdien eta gizartearen ardura” dela, oro har, “etorkizunera begira jarri eta salbuespenekin amaitzea, sufrimenduarekin amaitzea, gatazkaren konponbideari aterabide integral bat eskaintzeko lanean aritzea”.
Eta esplikatuko dute horregatik elkartuko direla urtarrilaren 11n Bilbon La Casillatik hasiko den manifestazioan, “aterabide integral bat eskatzeko, euskal preso, iheslari eta deportatuek etxerako bidea urratu dezaten, biolentzia ezberdinen biktimek egia jakin dezaten, aitortuak izan daitezen”.