Goazen Soraluze jarduera fisikoko orientazio zerbitzuaren eskutik, ibilaldi osasuntsuak egiten hasiko dira bihartik aurrera. Iaz moduan, aurten ere asmoa da hamabostean behin egitea halako bat, eta, eguraldia lagun ez den kasuetan, ibilaldiaren ordez, tailerrak edo bestelako dinamikak egitea kiroldegian bertan.
Aurtengo lehen ibilaldirako 09:30ean egin dute hitzordua, Kiroldegian. Bertan elkartu eta ordu eta erdi inguruko ibilbidea egingo dute, Osintxu aldera. Edozein herritarri zuzendutako ekimena da, doakoa.
Astean birritan
Osterantzean, Goazen Soraluzek astean birritan ematen du kirol aholkularitza: martitzenetan eta eguenetan. Maritzenetan, 09:00etatik 13:00etara eta 14:00etatik 16:00etara, eta, eguenetan, 11:15etik 13:15era. Gainera, eguenetan, 11:15etik 12:00etara indar ariketak egiten dituzte taldean eta bi astean behin, martitzenetan, anbulatorioan bertan ematen dute orientazioa,11:00etatik 13:00era.
Goazen Soraluze kirol orientazioa jarduera fisikoa egiten duen edo egin nahi duen edozein herritarri zuzendutako doako zerbitzua da. Aholkularitzaz gainera, jarduera fisikoa bultzatzeko bestelako ekimenak ere egiten dituzte, ibilaldi osasuntsuak, tailerrak eta beste.