Egueneko osoko bilkuran jakinarazi zenez, datozen asteotan adjudikatuko da edukiontzi marroiei (organikokoei) txip berriak jartzea eta berehala hasiko dira inplementatzen. Erabiltzaileek ere txartel berriak izango dituzte txip berriak martxan jartzen direnerako. Hartara, berriro ere, bosgarren edukiontziak -marroiak- txip bitartez erabili ahal izango dira bakarrik.
Debabarreneko Mankomunitatea arduratuko da aldaketa guztiak egiteaz, baina Soraluzeko Udala joango da gaiari buruzko informazioa ematen.
Unai Larreategi alkateak osoko bilkuran azaldu zuenez, hasieran, “Soraluze nahiko goian zegoen birziklatze-tasetan. Gaur egun, berriz, desastre doa. Badago utzikeria puntu bat bai hemen eta baita inguruko herrietan ere. Orain, Mankomunitateak ahalegina egingo du zentzu horretan eta ea ahalegin horren arrimura gaur egungo datuak hobetzen ditugun”.