Euskadiko Jokoetako txapeldun

Ubane Madera Zangitu 2024ko eka. 3a, 11:38

Aitz Arluziaga, Euskadiko Federazioko presidente Gotzon Enbil eta Zuhaitz Larra├▒aga. Argazkia: Iraultz Arluziaga.

Oso emaitza onak lortzen ari dira Soraluzeko Pilota Elkarteko ordezkariak. Batetik, asteburuan, Euskadiko Jokoetako txapeldun izendatu dira Infantil mailako Aitz Arluziaga eta Zuhaitz Larrañaga. Bestetik, Eki Amuategi eta Mikel Caramanzana jubenilek Debarroko finalerako txartela eskuratu zuten joan den astean. Azkenik, bihar, martitzena, nagusien mailan, Balerdik eta Atxotegik Debarroko finalerdia jokatuko dute Oñatiko Biain eta Tatiegi bikotearen kontra, 19:30ean, Araneko frontoian.

Azken bi asteburutan, Gipuzkoako ordezkari moduan jokatu dituzte Euskadiko Jokoak Soraluze Pilota Elkarteko Aitz Arluziagak eta Zuhaitz Larrañagak, bi gazteak Gipuzkoako Txapeldunak baitira Infantil mailan.

Soraluzetarrek Bizkaiko eta Arabako hirugarren mailako txapeldunen kontra jokatu dituzte partida bana eta biak ala biak irabazi egin dituzte, erraz, gainera, 18-6 eta 18-7. Hartara, Euskadiko Jokoetako txapeldun izendatu dira asteburu honetan.

Debarrokoan aurrera

Bestalde, Dabarroko txapelketan aurrera doaz Soraluzeko ordezkariak. Jubenilek dagoeneko lortu dute finalerako txartela. Joan den astean, Eki Amuategik eta Mikel Caramanzanak 22-18 irabazi zuten Aloña Mendiren kontrako partida. Orain, Oñatiko eta Bergarako bikoteen arteko itzuliko partida jokatzea falta da jakiteko soraluzetarrek finalean zein izango duten kontrario. Joanekoan, Bergarak irabazi zuen, 22-13. 

Emaitzekin segituz, lau t’erdiko txapelketatik kanpo geratu da Soraluze, atzo, jubenil bigarren mailan Mikel Caramanzanak 22-4 galdu baitzuen Alegiko Murua pilotariaren kontra.

Azkenik, bihar 19:30ean Araneko frontoian Debarroko finalerdia jokatuko dute Manex Balerdik eta Aitor Atxotegik Aloña Mendiko Biain eta Tatitegiren kontra.