Joan den asteburuan, galdu egin zuen Euskadiko txapeldunaren kontrako borroka Mochine El Kabouri Mou gazte soraluzetarrak, baina ahal zuen guztia egin zuela-eta, konforme bueltatu zen. “Bestea ona zen, saiatu nintzen, egin nuen egin behar nuen guztia, azkenean ez zen irten eta bigarren gelditu nintzen, baina konformatzen naiz”, kontatu du.
Gaineratutakoaren arabera, bere bizitzako bigarren borrokan, “hobeto” ikusi zuen bere burua eta “oso ondo eta nahiko eroso” sentitu zen. “Lehenengoa baino errazagoa izan zen. Nerbioek ere eragiten dute, ya ohitu nintzen apur bat eta ez nuen horrenbeste sufritu”.
Mou orain dela urte eta erdi hasi zen boxeoan eta 15 urterekin, hirugarren borrokaldian parte hartzeko gogotsu dago. Ekainean igoko da berriro ringera.
