Zapatuan, bi entrenamendu-saio egin zituzten Gipuzkoako 14-18 urte bitarteko errugbilari neskek, gazteenek lehenengo eta helduagoek segidan. Irungo Txinguditik, Donostiako Bera-Beratik, Ordizitik, Arrasatetik, Mutrikutik eta Eibartik etorri ziren jokalariak eta gogotik jardun zuten Bera-Berako Arrate Otaño Lijo eta Ihintza Alkorta Albisu entrenatzaileen eta SoraGazteak Rugby Klubeko Erika Pasenau soraluzetarraren esanetara.
SoraGazteak Rugby Klubaren eskutik antolatu zen saioa, Gipuzkoa mailako errugbi jokalariekin egiten duten bigarrena izan zen. Martxoaren 17an, berriz, hirugarren saioa izango dute, kasu honetan, 10-12 urte bitarteko jokalariekin.