Ezoziko Futbol zelaian jokatuko dute Sorako Gorengo mailakoek bihar 16:30etan, Mondragon taldea aurkari.
Ligako bi partidu jokatu dituzte urte hasieratik, biak kanpoan. Oñatin izan zuten lehenengoa, Aloña Mendi taldearen kontra, eta Urkirekin lehiatu ziren pasa den astean Eibarren. Partidu biotan gol bakarra lortu dute —Jokin Arrillagak azken minutuetan Aloña Mendiri egindakoa— eta "etxez kanpoko garaipen hori" lortu ezinda bueltatu dira etxera.
Asteburu honetan, Ezoziko futbol zelaian dute hitzordua. Emaitza bikainak lortu dituzte denboraldian zehar bertan, baina honako partidua ez da hain erraza izango: Aurreko jardunaldiak 2. eta 3. postuan zeuden Aloña eta Urkiren aurka izanda, oraingoan, sailkapenean lehenengo dagoen Mondragonen kontra jokatzea tokatu zaie.
| Pos. | Taldea | Puntuak |
|---|---|---|
| 1 | MONDRAGON C.F. | 41 |
| 2 | ALOÑA MENDI | 31 |
| 3 | URKI C.D. | 30 |
| 4 | ILINTXA S.D. | 29 |
| 5 | IKASBERRI K.E. | 26 |
| 6 | EUSKALDUNA ANDOAINDARRA S.D. | 25 |
| 7 | DANENA K.E. | 23 |
| 8 | ANAITASUNA C.D. B | 23 |
| 9 | SORALUZE C.F. | 21 |
| ... | ... | ... |
| 16 | ANTZUOLA K.E. | 8 |
Arrasatearrek 16 partidutik bakarra galdu dute (bi berdindu). Hortaz, zalegoaren animo eta txaloak ezinbesteko izango dituzte Gorengo mailako mutilek biharko norgehiagokan.
Ikus talde guztien emaitzak eta sailkapena, Plaentxia.eus-eko Soraren blogean.