Atzo, zapatua, Gisele Jackson artistak kontzertua eskaini zuen Antzokian, Blues Hotsak jaialdiaren eta Indarkeria Matxistaren Aurkako Nazioarteko Egunaren egitarauaren parte.
Emanaldia hasi aurretik, hiru "arau" jarri zizkion publikoari, «Kantua dakienari: kantatu; gogoa daukanari: astindu buztaneko lumak (ingelesezko esaera "dantzatu" esateko); eta denentzako agindua: disfrutatu». Oreka mantendu beharra zegoen ordea, disfrutatu eta dantzatu bai, baina baita gelditu eta adi entzun ere, miretsi, Jacksonek abesteko duen zentzugabeko gaitasuna eta Shu Shu hirukoteak inprobisatzeko duen trebezia; gitarrak, bateriak eta organoak bat eginda.
Divaren show-woman rola ere itzela izan zen. Nabarmentzekoa, gitarrista eta Jackson beraren arteko lehia: batak abesten zituen notak, besteak asmatu behar zituen gitarran; edo publiko artera jaitsi eta bikote bat dantzara atera zuenekoa.
Bikotea dantza pausoak ikasten. Argazkia: Juan Fernandez.
Bukatzean, publikoak «beste bat» eskatu eta beste bi eskaini zituzten Jackson eta Shu Shu-ek, jendez gainezka zegoen Antzokia txalo zaparrada batean lagata.
Amythology gaur
Amy Winehouse-en doinuekin amaituko da aurtengo Blues Hotsak jaialdia,19:00etan, Antzokian.
Amythology tributu taldea 2015ean sortu zen, Madrilen, «musika beltzaren azken diva handia izan zen Amy Winehouse-en omenaldi gisa». Zortzi taldekide dira eta Britainia Handiko artistak zuzenean eskaintzen zituen instrumentazioa eta errepertorioa errespetatzen dituzte «imitazio hutsa saihestuz, leial eta zintzoki interpretatuz».
Oharra: Geratzen diren sarrerak Antzokian bertan erosi ahalko dira, emanaldia hasi baino lehen.
