A30 Greba feminista orokorra

Greba Orokor Feministarako lanketa abiatu dute hainbat erakundetako zein alorretako ordezkariek

Ubane Madera Zangitu 2023ko aza. 2a, 18:07
Hainbat erakundetako zein lan esparrutako ordezkariak asteleheneko topaketan, Gaztetxean.

Hainbat erakundetako zein lan esparrutako emakume soraluzetar Azaroaren 30eko Greba Orokor Feministara begira lanean hasi dira. Aste honetan egin dute lehen topaketa eta hasierako lan-ildoak zehaztu. Grebara bitartean, astelehenero elkartuko dira Gaztetxean, eta, jakinarazi dute ateak zabalik dituztela parte hartu nahi duten emakume zein gizon guztiendako. 

Aste honetako astelehenean, ia 15 lagun elkartu ziren Gaztetxean Azaroaren 30erako deituta dagoen Greba Orokor Feminista lantzeko asmoz. Bertan izan ziren herriko Pentsiodunen Mugimenduko ordezkariak, etxez etxeko zerbitzuetakoak, garbiketa alorreko ordezkariak, sindikatuetakoak eta Mesedeetako Egoitzako ordezkariak. 

Soldatak, baldintzak…

Besteak beste, Soraluzen, grebaren eta haren helburuen berri emateko bideak aztertu zituzten eta grebara begira emakumeei gehien eragiten dieten esparruen artean zeintzuk landu mahai gaineratu zuten, beti ere, grebak ardatz duen zaintzaren gaia erdigunean jarrita. Adibidez, zenbait lan esparrutan emakumeen eta gizonezkoen artean ematen den soldata arrakala hizpide izan zuten eta baita ere, zenbait lan feminizatuetan izaten diren baldintza kaskarrak.

Horrekin batera, adostu zuten azaroaren 30era bitartean, astelehenero elkartuko direla Gaztetxean, eta, jakinarazi zuten ateak zabalik dituztela parte hartu nahi duten emakume zein gizon guztiendako. 18:30ean elkartuko dira.