Espainiako hauteskundeak 2023

Gaur bukatuko dute posta bidezko botoak banatzen

Ubane Madera Zangitu 2023ko uzt. 19a, 09:02
Postaria botoak banatzen, atzo, Errekalden.

Egunotan, Soraluzeko Correoseko langileak buru-belarri ari dira lanean posta bidezko botoak direla-eta. Zapatu goizean bulegoa zabaltzeaz gainera, astelehenaz geroztik goizez zein arratsaldez ari dira soraluzetarrek eskatutako botoak herritarrei helarazten. Gaur bukatuko dute banaketa.

Gaur ere, eguaztena, goizez zein arratsaldez jardungo dute lanean postariek posta bidezko botoak garaiz irits daitezen. Esan dutenez, lan eskerga izaten ari dira, baina ezarritako epea beteko dute.

Hain justu, botoa posta bidez eskatu dutenek bihar arteko, uztailaren 20ra arteko epea dute gutun-azala botoarekin entregatzeko posta bulegoan.